ChatGPT மூலம் உருவாக்கப்பட்ட போலி நீதிமன்ற வழக்குகளை பயன்படுத்திய கியூபெக் நபருக்கு $1,000 அபராதம்

கியூபெக்கில் விவாகரத்துக்குப் பின்னர் சொத்துப் பிரிப்பு தொடர்பான வழக்கில், ChatGPT மூலம் உருவாக்கப்பட்ட போலியான நீதிமன்றத் தீர்ப்புகளை தனது சட்ட வாதங்களில் பயன்படுத்திய நபர், தனது முன்னாள் மனைவிக்கு 1,000 கனேடிய டொலர்களை செலுத்த வேண்டும் என கியூபெக் மேன்முறையீட்டு நீதிமன்றம் உத்தரவிட்டுள்ளது.

ஆகஸ்ட் 11ஆம் திகதி வழங்கப்பட்ட தீர்ப்பின்படி, குறித்த நபர் தனது வழக்கில் தானே ஆஜராகி வாதாடியுள்ளார். அப்போது நீதிமன்றத்தில் இடம்பெறாத நான்கு போலியான நீதிமன்றத் தீர்ப்புகளை மேற்கோள் காட்டியுள்ளார். அவற்றில் இரண்டு தீர்ப்புகள் கனடாவின் உச்ச நீதிமன்றத்தால் வழங்கப்பட்டவை என அவர் குறிப்பிட்டிருந்ததாகவும் நீதிமன்றம் தெரிவித்துள்ளது.

பின்னர், ஒரு சட்டத்தரணியுடன் ஆலோசனை நடத்தியபோது அந்த வழக்குகள் உண்மையில் இல்லாதவை என்பதை அவர் அறிந்துள்ளார். இருந்தபோதிலும், அவை தவறானவை என்பதை தனது நீதிமன்ற ஆவணங்களில் இருந்து நீக்காமல் தொடர்ந்து தாக்கல் செய்துள்ளார்.

விசாரணையின்போது நீதிபதிகள் அவரிடம் கேள்வி எழுப்பிய பின்னரே, அந்த போலியான வழக்குத் தீர்ப்புகள் ChatGPT மூலம் உருவாக்கப்பட்டவை என்று அவர் தெரிவித்ததாக கியூபெக் மேன்முறையீட்டு நீதிமன்றம் குறிப்பிட்டுள்ளது.

தெரிந்தே போலியான நீதிமன்றத் தீர்ப்புகளை மேற்கோள் காட்டியது தீவிரமான நீதிமன்ற முறைகேடு என நீதிபதிகள் தெரிவித்துள்ளனர். இதனால் நீதிமன்றத்திற்கும் அவரது முன்னாள் மனைவிக்கும் தேவையற்ற கூடுதல் பணிச்சுமை ஏற்பட்டதாகவும் நீதிமன்றம் கூறியுள்ளது.

இதன் காரணமாக, முன்னாள் மனைவி வழக்கிற்காக செலவிட்ட நேரம் மற்றும் மேற்கொண்ட பணிக்கான இழப்பீடாக $1,000 வழங்குவதுடன், மேன்முறையீட்டு வழக்குக்கான சட்டச் செலவுகளையும் அவர் செலுத்த வேண்டும் என நீதிமன்றம் உத்தரவிட்டுள்ளது.

இந்தச் சம்பவம், சட்ட நடவடிக்கைகளில் செயற்கை நுண்ணறிவு கருவிகளைப் பயன்படுத்தும்போது உருவாக்கப்படும் தகவல்கள் மற்றும் சட்ட மேற்கோள்களை முறையாக சரிபார்ப்பதன் அவசியத்தை மீண்டும் வெளிப்படுத்தியுள்ளது. ChatGPT போன்ற AI கருவிகள் இல்லாத நீதிமன்ற வழக்குகள் அல்லது தவறான சட்டத் தகவல்களை உருவாக்கக்கூடும் என்பதால், அவற்றை நேரடியாக நீதிமன்ற ஆவணங்களில் பயன்படுத்துவதற்கு முன்பு சட்ட நிபுணர்களால் சரிபார்ப்பது அவசியமாகும்.