சர்வதேச மாணவர்கள் தற்போது கடும் நெருக்கடியை எதிர்கொண்டுள்ளனர்

கனடாவில் கல்வியை முடித்த பின்னர் Post-Graduation Work Permit (PGWP) பெற்று வேலை செய்யலாம் என்ற எதிர்பார்ப்புடன் வந்த சர்வதேச மாணவர்கள் தற்போது கடும் நெருக்கடியை எதிர்கொண்டுள்ளனர். Alberta மாகாணத்தில் சில கல்வி நிறுவனங்களில் படிப்பை முடித்த மாணவர்களின் PGWP விண்ணப்பங்கள் நிராகரிக்கப்பட்டதைத் தொடர்ந்து, மாணவர்கள் போராட்டத்தில் ஈடுபட்டுள்ளனர்.

குறிப்பாக Calgary மற்றும் Edmonton பகுதிகளில் நூற்றுக்கணக்கான சர்வதேச மாணவர்கள் இந்த விவகாரத்திற்கு எதிர்ப்பு தெரிவித்து பல வாரங்களாக போராட்டம் நடத்தி வருகின்றனர். சில மாணவர்கள் உண்ணாவிரதப் போராட்டத்திலும் ஈடுபட்டுள்ளதாக தெரிவிக்கப்படுகிறது.

மாணவர்கள் எதிர்கொள்ளும் முக்கிய பிரச்சினையாக அவர்கள் படித்த சில career மற்றும் vocational கல்வித் திட்டங்கள் ‘non-credit programs’ என வகைப்படுத்தப்பட்டிருப்பது குறிப்பிடப்படுகிறது.

2024ஆம் ஆண்டு இந்தப் படிப்புகளில் இணைந்தபோது, கல்வியை வெற்றிகரமாக முடித்த பின்னர் PGWP பெறுவதற்கான வாய்ப்பு இருப்பதாக தங்களுக்கு தெரிவிக்கப்பட்டதாக மாணவர்கள் கூறுகின்றனர். இதனை நம்பி பலர் கல்விக் கட்டணம் மற்றும் வாழ்க்கைச் செலவுகளுக்காக பெருமளவு பணத்தை செலவிட்டுள்ளனர்.

ஆனால் கல்வியை முடித்த பின்னர் PGWP விண்ணப்பங்களை சமர்ப்பித்தபோது, தாங்கள் படித்த கல்வித் திட்டங்கள் அதற்கான தகுதியை பூர்த்தி செய்யவில்லை எனக் கூறி விண்ணப்பங்கள் நிராகரிக்கப்பட்டதாக மாணவர்கள் தெரிவிக்கின்றனர்.

இந்த விவகாரத்தில் கனடாவின் குடிவரவு, அகதிகள் மற்றும் குடியுரிமைத் துறை (IRCC), PGWP விதிகளில் புதிதாக எந்த மாற்றமும் செய்யப்படவில்லை எனத் தெரிவித்துள்ளது. Degree, diploma அல்லது certificate வழங்கும் தகுதியான கல்வித் திட்டமாக இருக்க வேண்டும் என்ற விதி ஏற்கனவே நடைமுறையில் இருந்ததாக IRCC கூறுகிறது.

எனினும், மாணவர்கள் இதனை ஏற்க மறுக்கின்றனர். தாங்கள் கல்வியில் இணைந்தபோது, தங்களது குறிப்பிட்ட கல்வித் திட்டங்கள் ‘non-credit programs’ என்பதாலும் PGWP பெற தகுதியற்றவை என்பதாலும் தெளிவாகத் தெரிவிக்கப்படவில்லை என அவர்கள் குற்றம் சாட்டுகின்றனர்.

இதனால் கல்விக்காக ஆயிரக்கணக்கான கனடிய டொலர்களை செலவிட்ட மாணவர்களின் எதிர்காலம் கேள்விக்குறியாகியுள்ளது. படிப்பை முடித்த பின்னர் கனடாவில் வேலை செய்து அனுபவம் பெற்று, எதிர்காலத்தில் நிரந்தரக் குடியிருப்புக்கான வாய்ப்புகளைப் பெறலாம் என்ற அவர்களின் திட்டங்களும் பாதிக்கப்பட்டுள்ளன.

இந்த விவகாரம் சர்வதேச மாணவர்களுக்கு கனடாவில் கல்வித் திட்டத்தைத் தேர்வு செய்வதற்கு முன், அந்தப் படிப்பு PGWP-க்கு தகுதியானதா என்பதை அதிகாரப்பூர்வமாக உறுதி செய்வதன் அவசியத்தையும் எடுத்துக்காட்டுகிறது.

PGWP என்பது படிப்பு முடித்த சர்வதேச மாணவர்களுக்கு கனடாவில் வேலை அனுபவத்தைப் பெறுவதற்கான முக்கியமான பாதையாக இருந்து வருகிறது. எனவே, கல்வி நிறுவனங்கள் வழங்கும் தகவல்களையும், குடிவரவு விதிகளையும் மாணவர்கள் தனித்தனியாக சரிபார்க்க வேண்டும் என்ற எச்சரிக்கையும் இந்தச் சம்பவத்தின் மூலம் எழுந்துள்ளது.

தற்போது பாதிக்கப்பட்ட மாணவர்கள் தங்களது PGWP மறுப்புக்கு எதிராக கிடைக்கக்கூடிய சட்ட மற்றும் குடிவரவு வழிமுறைகள் குறித்து ஆலோசித்து வருகின்றனர். இந்த விவகாரத்தில் அடுத்தகட்ட நடவடிக்கைகள் குறித்து மாணவர்களும் சம்பந்தப்பட்ட தரப்பினரும் தொடர்ந்து அழுத்தம் கொடுத்து வருகின்றனர்.