கனடாவின் பொருளாதாரத்தை மேம்படுத்த  ரூ.142 பில்லியன் திட்டம்

கனடாவின் பொருளாதாரத்தை மேம்படுத்தவும், குடிமக்களின் வாழ்க்கைச் செலவு அழுத்தங்களைக் குறைக்கவும், வீடற்ற நிலையை ஒழிக்கவும் 142.1 பில்லியன் டாலர் மதிப்பிலான புதிய வரிச் சலுகைகள் மற்றும் செலவினத் திட்டங்களை பிரதமர் மார்க் கார்னியின் அரசு பட்ஜெட் 2026 வாயிலாக வெளியிட்டுள்ளது. வியாழக்கிழமை நாடாளுமன்றத்தில் நிதியமைச்சர் பிரான்சுவா-பிலிப் ஷாம்பெயின் இந்த பட்ஜெட்டைத் தாக்கல் செய்தார்.

நடப்பு பட்ஜெட் ஆண்டில் நாட்டின் நிதிப்பற்றாக்குறை 62.3 பில்லியன் டாலராக இருக்கும் என கணிக்கப்பட்டுள்ளது. அடுத்த நான்கு ஆண்டுகளிலும் ஒவ்வொரு ஆண்டும் பற்றாக்குறை 50 பில்லியன் டாலருக்கு மேல் நீடிக்கும் எனவும், பட்ஜெட்டை சமன் செய்வதற்கான வழிமுறைகள் எதுவும் இதில் குறிப்பிடப்படவில்லை எனவும் தெரிவிக்கப்பட்டுள்ளது. அரசின் வருவாய் கணிசமாக உயர்ந்த போதிலும், அதனை சேமிக்காமல் செலவிட பிரதமர் முடிவு செய்துள்ளதாக ஆவணங்கள் கூறுகின்றன.

குறிப்பாக, வரலாற்றில் முதன்முறையாக கனடா மாகாணங்களுக்கு வழங்கும் சுகாதார நிதிப் பகிர்வை விட கடனுக்கான வட்டிச் செலவு அதிகரித்துள்ளது. நடப்பாண்டில் சுகாதாரத் துறைக்காக 57.4 பில்லியன் டாலர் ஒதுக்கப்பட்டுள்ள நிலையில், கடனை நிர்வகிக்க 60.2 பில்லியன் டாலர் செலவாகும் என்று கணக்கிடப்பட்டுள்ளது. இது வரி வருவாயில் ஒவ்வொரு டாலரிலும் பத்து காசுகள் ஆகும். 2030-ஆம் ஆண்டிற்குள் இது பன்னிரண்டு காசுகளாக உயரும் என மதிப்பிடப்பட்டுள்ளது.

அடுத்த ஐந்து ஆண்டுகளில் வணிக முதலீடுகளை ஊக்குவிக்கும் நோக்கில் 36.1 பில்லியன் டாலர் மதிப்பிலான உற்பத்திப் பெருந்தொகை கழிவு அறிவிக்கப்பட்டுள்ளது. மேலும், பழங்குடியினர் நல்லிணக்கம், கல்வி மற்றும் நீர் உள்கட்டமைப்புக்காக 26.6 பில்லியன் டாலரும், வீடற்ற நிலையை பத்தாண்டுகளுக்குள் முடிவுக்குக் கொண்டுவர 11.2 பில்லியன் டாலரும், மளிகைக் கட்டணக் கழிவிற்காகக் கூடுதலாக 4.6 பில்லியன் டாலரும் ஒதுக்கப்பட்டுள்ளது.

இத்திட்டங்கள் குறித்துப் பேசிய பழமைவாதக் கட்சித் தலைவர் பியர் பொய்லியேவ்ரே, இது நாட்டை கடனில் ஆழ்த்தும் பட்ஜெட் என்றும், இதனை எதிர்த்து வாக்களிக்க உள்ளதாகவும் தெரிவித்தார். புதிய ஜனநாயகக் கட்சி மற்றும் பசுமைக் கட்சியும் இச்செலவின முன்னுரிமைகள் மற்றும் பருவநிலை இலக்குகள் கைவிடப்பட்டதை விமர்சித்துள்ளன.