ஒன்ராறியோ லைன் மெட்ரோ திட்டச் செலவு 29 பில்லியன் டொலராக உயர்வு

டொரண்டோ: டொரண்டோ நகரில் முன்னெடுக்கப்பட்டு வரும் ஒன்ராறியோ லைன் மெட்ரோ திட்டத்தின் கட்டுமானச் செலவு கடந்த 2019ஆம் ஆண்டுடன் ஒப்பிடுகையில் கிட்டத்தட்ட மூன்று மடங்காக அதிகரித்துள்ளதாக புதிய மதிப்பீடுகள் தெரிவிக்கின்றன.

Metrolinx வெளியிட்டுள்ள சமீபத்திய State of the Network அறிக்கையின்படி, இந்த ஆண்டு ஜூன் மாத நிலவரப்படி ஒன்ராறியோ லைன் திட்டத்தின் மதிப்பிடப்பட்ட செலவு சுமார் 29 பில்லியன் கனேடிய டொலர்கள் என தெரிவிக்கப்பட்டுள்ளது.

இந்தத் திட்டம் முதன்முதலில் 2019ஆம் ஆண்டு அறிவிக்கப்பட்டபோது அதன் கட்டுமானச் செலவு 10.9 பில்லியன் டொலர்கள் என மதிப்பிடப்பட்டது. 2022ஆம் ஆண்டில் அந்தத் தொகை கிட்டத்தட்ட இரட்டிப்பாகி 20 பில்லியன் டொலர்களை நெருங்கியது.

தற்போது திட்டத்தின் மேலும் ஒரு முக்கிய ஒப்பந்தம் வழங்கப்பட்டுள்ளதால், மொத்தச் செலவு 34 பில்லியன் டொலர்களை நெருங்கக்கூடும் என எதிர்பார்க்கப்படுகிறது.

Pape பகுதியில் சுரங்கப்பாதை மற்றும் நிலத்தடி நிலையங்களை அமைப்பதற்கான புதிய ஒப்பந்தம் 4.32 பில்லியன் டொலர் மதிப்பில் வழங்கப்பட்டுள்ளது.

இறுதி செலவு இன்னும் உறுதி செய்யப்படவில்லை

ஒன்ராறியோ லைன் திட்டத்தின் வரவு-செலவுத் திட்டம் கடுமையான அழுத்தத்தில் இருப்பதை Metrolinx தலைமை நிர்வாக அதிகாரி மைக்கேல் லிண்ட்சே ஒப்புக்கொண்டுள்ளார்.

எனினும், இன்னும் ஒரு முக்கிய ஒப்பந்தத்தின் விலை இறுதி செய்யப்படாததால், திட்டத்தின் புதிய மொத்தச் செலவை தற்போது உறுதிப்படுத்த முடியாது என அவர் தெரிவித்துள்ளார்.

திட்டத்தின் செலவு அதிகரிப்பதற்கான காரணங்களில் உலகளாவிய விநியோகச் சங்கிலி பாதிப்பு மற்றும் வர்த்தகத் தொடர்பான நிச்சயமற்ற நிலை ஆகியவை முக்கியமானவை என லிண்ட்சே குறிப்பிட்டுள்ளார்.

ஒன்ராறியோ லைன் திட்டத்தில் ஒவ்வொரு பணிக்கும் போட்டி அடிப்படையிலான ஒப்பந்த நடைமுறை பின்பற்றப்படுவதாகவும், ஒப்பந்தங்கள் இறுதி செய்யப்பட்ட பின்னர் அவற்றின் விவரங்கள் இணையத்தில் வெளியிடப்படுவதாகவும் அவர் தெரிவித்துள்ளார்.

இன்னும் உயர்த்தப்பட்ட ரயில் பாதைகள் மற்றும் நிலையங்கள் தொடர்பான ஒரு தொகுப்பின் விலை இறுதி செய்யப்பட வேண்டியுள்ளது. அந்த ஒப்பந்தம் முடிவடைந்த பின்னரே திட்டத்தின் மொத்தச் செலவை முழுமையாக கணக்கிட முடியும் என Metrolinx தெரிவித்துள்ளது.

2031ஆம் ஆண்டில்தான் பணிகள் நிறைவடையும்

சுமார் 16 கிலோமீற்றர் நீளமான புதிய ஒன்ராறியோ லைன் மெட்ரோ பாதையின் கட்டுமானப் பணிகள் 2022 மார்ச் மாதத்தில் ஆரம்பிக்கப்பட்டன.

முதலில் திட்டமிடப்பட்ட கால அட்டவணையின்படி பணிகள் 2027ஆம் ஆண்டளவில் நிறைவடைய வேண்டியிருந்தது. ஆனால் தற்போது திட்டம் 2031ஆம் ஆண்டில்தான் நிறைவடையும் என எதிர்பார்க்கப்படுகிறது.

இதன்படி, ஒன்ராறியோ லைன் திட்டம் ஆரம்பத்தில் எதிர்பார்க்கப்பட்ட காலத்தை விட சுமார் நான்கு ஆண்டுகள் தாமதமாக நிறைவடையவுள்ளது.

திட்டச் செலவு தொடர்ந்து அதிகரித்து வருவதால், இறுதியில் பொதுமக்களின் வரிப்பணத்தில் இதன் தாக்கம் எவ்வளவு இருக்கும் என்பது தொடர்பிலும் கேள்விகள் எழுந்துள்ளன.