அம்பாந்தோட்டை தேர்தல் பிரச்சாரக் கூட்டத்தில் பொதுமக்கள் மீது தாக்குதல் ; சிறுவன் காயம்
ஸ்ரீ லங்கா பொதுஜன பெரமுனவின் ஜனாதிபதி வேட்பாளர் நாமல் ராஜபக்ஷவுக்கு சார்பாக அம்பாந்தோட்டை சிறிபோபுர பிரதேசத்தில் நடைபெற்ற தேர்தல் பிரச்சாரக் கூட்டத்தில் இனந்தெரியாத நபர்கள் சிலரால் மேற்கொள்ளப்பட்ட தாக்குதலில் சிறுவன் ஒருவன் காயமடைந்துள்ளதாக அம்பாந்தோட்டை பொலிஸார் தெரிவித்தனர்.
அம்பாந்தோட்டை , மயுரபுர பிரதேசத்தைச் சேர்ந்த சிறுவனே காயமடைந்துள்ளார்.
இது தொடர்பில் தெரியவருவதாவது,
ஸ்ரீ லங்கா பொதுஜன பெரமுனவின் ஜனாதிபதி வேட்பாளரான நாமல் ராஜபக்ஷவுக்கு சார்பாக அம்பாந்தோட்டை சிறிபோபுர பிரதேசத்தில் நடைபெற்ற தேர்தல் பிரச்சாரக் கூட்டத்திற்குச் சென்ற இனந்தெரியாத நபர்கள் சிலர் அங்கிருந்த பொதுமக்கள் மீது கல்லெறிந்துள்ளனர்.
இதன்போது, அக்கூட்டத்திலிருந்த சிறுவன் ஒருவன் காயமடைந்துள்ள நிலையில் அம்பாந்தோட்டை மாவட்ட பொது வைத்தியசாலையில் அனுமதிக்கப்பட்டுள்ளார்.
இந்த தேர்தல் பிரச்சாரக் கூட்டத்தில் நாமல் ராஜபக்ஷ, சமல் ராஜபக்ஷ மற்றும் சசீந்திர ராஜபக்ஷ ஆகியோர் கலந்து கொள்ளவிருந்த நிலையில் இந்த தாக்குதலையடுத்து அவர்கள் மூவரும் தேர்தல் பிரச்சாரக் கூட்டத்திற்கு சமுகமளிக்கவில்லை என பொலிஸார் தெரிவித்தனர்.
இது தொடர்பான மேலதிக விசாரணைகளை அம்பாந்தோட்டை பொலிஸார் மேற்கொண்டு வருகின்றனர்.